Курортология және медициналық оңалту ҒЗИ және ФМБМ «ҰМОКЗО» халықаралық қатынастарды нығайту мақсатында ынтымақтастық туралы келісімге қол қойды

Жарияланды: admin

Қазақстан Республикасының Денсаулық сақтау министрлігінің курортология және медициналық оңалту ҒЗИ және Ресей Федерациясының Федералдық мемлекеттік бюджеттік мекемесі Ұлттық медициналық оңалту және курортология зерттеу орталығы (ҰМОКЗО) денсаулық сақтау, медициналық білім және ғылым саласындағы ынтымақтастық туралы келісімге қол қойды.

Атап айтқанда, ынтымақтастық медициналық көмекті ұйымдастырудағы теориялық және практикалық дағдыларды бірлесіп дамытуды, оның ішінде міндетті медициналық сақтандыру шеңберінде, медициналық оңалту және санаторлы-курорттық емдеу саласындағы медициналық көмектің сапасын, қолжетімділігін және қауіпсіздігін қамтамасыз етуді, сондай-ақ аурудың алдын алуды, салауатты өмір салтын насихаттаудағы өзара іс-шараларды қамтиды.

Келісім сондай-ақ медициналық кадрларды кәсіби даярлауға, қайта даярлауға және олардың біліктілігін арттыруға, сондай-ақ кәсіби медициналық қоғамдастықта моральдық-этикалық құндылықтарды нығайтуға және басқа да аспектілерге бағытталған.

Медицина ғылымының басым бағыттарын дамыту, медициналық көмектің сапасы мен қолжетімділігі мәселелері бойынша ғылыми және ғылыми-техникалық жобаларды әзірлеу және іске асыру, сондай-ақ медициналық көмек және басқа да қызмет саласындағы халықаралық ынтымақтастық жоспарлануда.

Бірлескен жобалар семинарлар, медициналық оңалту және курорттық емдеудің кешенді бағдарламаларын әзірлеу және енгізу, ғылыми конференциялар, жұмыс кездесулері және өзара мүдделі салалардағы басқа да ғылыми іс-шаралар арқылы жүзеге асырылатын болады.

ҚР ДСМ курортология және медициналық оңалту ҒЗИ халықаралық санаторлы – курорттық ұйымдармен өзара ынтымақтастықты нығайтуды жалғастыруда.

Мамыр 24, 2024, 7:35 Т.Қ.